बिहिवार, श्रावण ११ २०८०

नाडालाई महासंघ बनाउन देशभर सुझाव संकलन गरिँदै

नागरिक अनलाइन

1.9K

नाडालाई महासंघ बनाउन देशभर सुझाव संकलन गरिँदै

बुटवल,साउन ११।

अटोमोबाईल्स एशोसिएशन अफ नेपाल (नाडा) लाई महासंघको स्वरुपमा लगेर बलियो बनाउने गरि सुझाव संकलन शुरु भएको छ ।

नेपाल अटोमोबाईल्स एशोसिएशन अफ नेपालका केन्द्रीय केन्द्रीय अध्यक्ष ध्रुव बहादुर थापासहितको केन्द्रीय टिम विशेष अभियान लिएर देश दौडाहामा हिडेका छन । सबै अटोमोबाईल्स ब्यवसायीहरुलाई संगठित गर्ने र समेट्ने लक्ष्यसहित आफुहरु लागेको अध्यक्ष थापाले नागरिक अनलाइनलाई बताए ।

बुधबार रुपन्देहीमा नाडा अटोमोबाईल्स एशोसियशन अफ नेपाल र लुम्बिनी अटोमोबाईल्स एशोसिएशन अफ नेपालको संयुक्त अन्तरक्रिया कार्यक्रममा उनले अटोमोबाईल ब्यवसायीहरुको हकहितमा काम गर्ने एकमात्र संस्था भएको दाबी गरे । सरकारबाट ल्याएको नीति, लेभलिङका विषय र यसको प्रभाव बुझ्ने लक्ष्य रहेको उनले बताए। ब्यवसायीहरु एकजुट हुन नसके कमजोर हुने दाबी गर्दै उनले विधानमा नाडा महासंघको स्वरुपमा लैजाने, प्रदेश संरचनाभित्र जिल्ला समेट्न विषयमा छलफल गरिएको बताए ।

कार्यक्रममा केन्द्रीय उपाध्यक्ष राजनबाबु श्रेष्ठ, निराकर श्रेष्ठ, केन्द्रीय महासचिव सुरेन्द्र कुमार उप्रेतीले केन्द्रस्तरबाट विधान संशोधन गर्नेभन्दा पनि जिल्ला र प्रदेश तहबाट नै सुझाव संकलन गरि संशोधन गर्ने गरि आफुहरु लागेको बताए ।

रुपन्देहीमा एउटै ब्यवसायमा आवद्धहरु दुई संस्थामार्फत अघि बढेको बेला मिलाएर जानुपर्ने उनीहरुको सुझाव दिए । अडानका उपाध्यक्ष पुरन ज्ञवालीले चार पाग्रे सवारी कारोबारमा आवद्धहरु संगठित भएर अडान गठन गरेको बताए। भन्सार, सरकारको करनिति जस्ता समस्याहरु देखिएको र यसलाई समाधानमा जोडदिनुपर्ने सुझाव दिए । चारपाग्रे सवारी बिक्रेता डिलरलाई समेटेर २७ जना रहेको उनले बताए ।

यसैगरि महासचिव देबेन्द्र पौडेलले अडान गठन गरिरहदा आफुहरु नाडाको पहिलेबाट नै सदस्य रहेको बताए । नाडा लुम्बिनीका अध्यक्ष गणेश भट्टराईले आफ्नो कार्यकालमा ब्यवसायिक हकहितसंगै सामाजिक गतिविधि गर्न सफल भएको बताए । भिसिटिएस तालिम, ब्यवसायीहरुलाई कर तालिम गर्दै आएको उनले बताए ।

प्रदेश संरचना रहेका ब्यवसायिहरुलाई प्रदेश अन्तरगत सदस्यता लिने ब्यवस्था गर्नुपर्ने लुम्बिनी नाडाका महासचिव रोशन पाण्डेले सुझाव दिए ।

नागरिक अनलाइनमा प्रकाशित कुनैपनि सामग्रीबारे गुनासो,सूचना तथा सुझाव भए हामीलाई nagarikonlinenews@gmail.com मा पठाउनुहोला।)