शुक्रवार, भाद्र ३१ २०७९

लौरो अभियानले गर्यो रुपन्देहीमा स्वतन्त्र उम्मेदवारी घोषणा,क्षेत्र न.२ मा डा.निकोलस,३ मा बन्जाडे

नागरिक अनलाइन

3.1K

लौरो अभियानले गर्यो रुपन्देहीमा स्वतन्त्र उम्मेदवारी घोषणा,क्षेत्र न.२ मा डा.निकोलस,३ मा बन्जाडे

बुटवल,भदौ ३१ ।

स्वतन्त्र तथा वैकल्पिक शक्तिको लौरो अभियानले रुपन्देहीमा उम्मेदवारी घोषणा गरेको छ । जसअनुसार प्रतिनिधि सभा सदस्यतर्फ रुपन्देही–१ मा विशाल बास्कोटा, २ मा डा.निकोलस भुसाल, ३ मा प्रख्यात बन्जाडे र ५ मा भीष्म राना छन् ।

बास्कोटा स्वास्थ्यकर्मी, डा.भुसाल मनोरोग चिकित्सक,बन्जाडे अधिवक्ता र राना पूर्व भारतीय सैनिक हुन् । यस्तै प्रदेश सभा सदस्यतर्फ रुपन्देही ४ खमा सञ्जयकुमार मिश्रा र ५ क मा कमल ढकालले उम्मेदवारी घोषणा गरेका छन् ।

यस्तै कपिलवस्तु क्षेत्र नं १ प्रतिनिधिसभा सदस्यमा इन्जिनियर देवेन्द्रकुमार शर्मा र प्युठानमा रामचन्द्र केसीले उम्मेदवार बन्ने घोषणा गरेका छन् । उनीहरूलाई हाम्रो नेपाली पार्टीका अध्यक्ष अनन्तराज घिमिरे र लौरो अभियानका संयोजक सुमन सायमीले चुनाव चिन्ह लौरो प्रदान गरेका छन् ।

उम्मेदवारी घोषणा कार्यक्रममा बोल्दै हाम्रो नेपाली पार्टीका अध्यक्ष अनन्तराज घिमिरेले सक्षम र योग्य युवाहरूलाई निर्वाचित गरेर देश बनाउने संकल्पसहित लौरो अभियान शुरु भएको बताए ।

लौरो अभियानका संयोजक सुमन सायमीले सत्तामा रहेका दलहरुमा गठबन्धनको अहंकार रहेको र दलीय सर्वसत्तावाद लादेको भन्दै नागरिकहरु यसबाट मुक्त भए मात्रै परिवर्तन आउन सक्ने बताए ।

नागरिक अनलाइनमा प्रकाशित कुनैपनि सामग्रीबारे गुनासो,सूचना तथा सुझाव भए हामीलाई nagarikonlinenews@gmail.com मा पठाउनुहोला।)