शुक्रवार, आश्विन १ २०७८

‘भर्खर विद्रोहको सलाईको काँटी सल्किएको छ र विस्तारै यो फैलिदै जान्छ’ : रामकुमारी झाँक्री

नागरिक अनलाइन

2.7K

‘भर्खर विद्रोहको सलाईको काँटी सल्किएको छ र विस्तारै यो फैलिदै जान्छ’ : रामकुमारी झाँक्री

बुटवल,असाेज १ ।

नेकपा (एकिकृत समाजवादी)की नेतृ रामकुमारी झाँक्रीले क्रान्तिकारी इतिहास बोकेका कार्यकर्ताहरुले चिन्ह होईन बिचार रोज्ने बताएकी छन् ।

एकिकृत समाजवादी पार्टीको लुम्बिनी प्रदेश कमिटीको बैठकलाई बुटवलमा सम्बोधन गर्दै झाँक्रीले सलाईको काँटीको झिल्को जस्तै बनेर प्रतिगमनकारीको योजनालाई ध्वस्त बनाउन कार्यकर्ताहरुलाई आग्रह समेत गरिन् ।

‘आजै विद्रोह र संघर्षबाट आएको पार्टी भोलि नै ठूलो पार्टी बन्छ ? उनले भनिन्-‘वस्तुगत अवस्थाले यसो भन्छ त ? नभन्न पनि सक्छ, आज विद्रोहको प्रक्रिया शुरु भएको छ, लुम्बिनीमा भर्खर विद्रोहको सलाईको काँटी सल्किएको छ र विस्तारै यो फैलिदै जान्छ।’

पार्टीको भविष्य सुनिश्चित छ :

उनले एकीकृत समाजवादी पार्टी बहुसंख्यक युवाहरु र सम्मान गर्न लायक अग्रजहरुको पार्टी बन्ने बताइन्।

उनले नेपालमा अग्रगामी बनाउने अभियान शुरू भएको उल्लेख गर्दै गलत प्रबृत्तिका बिरूद्ध बिद्रोह भएकाले एकिकृत समाजवादी पार्टीको भविष्य सुनिश्चित रहेको दाबी गरिन् ।

एमालेका नेताहरुले बिद्रोहमा सहभागी हुन चाहने कार्यकर्तालाई राजनीतिक भविष्य र ब्यक्तिगत भविष्यको ग्यारेन्टी बाँड्दै हिँडेको आरोप लगाउँदै भ्रममा नपर्न कार्यकर्ताहरुलाई आग्रह गरिन् । क्रान्तिकारी इतिहास बोकेका कार्यकर्ताहरुले चिन्ह होईन बिचार रोज्ने उनको बिश्वास छ ।

‘हामीलाई लुम्बिनीमा चुनौती दिनेहरुलाई हामीले अब चुनौती दिन्छौं’ :

‘हामी विद्रोहबाट आएका छौं, चुनौतीहरु छन् तिनलाई चिर्दै हामी अघि बढ्ने हो, केन्द्र, प्रदेश र जिल्ला तहका नेताहरु उपस्थित बैठकमा उनले अगाडि भनिन् -‘हामीलाई लुम्बिनीमा चुनौती दिनेहरुलाई हामीले अब चुनौती दिन्छौं, त्यसका लागि पार्टी बनाउन लाग्नुस् र युवा र अग्रज मिलेर यो अभियानलाई अघि बढाउँ।’

कार्यक्रममा नेताहरु डा.विजय पौडेल, सोमप्रसाद पाण्डे, मेटमणि चौधरी, राजु गुरुङ लगायतले बोल्दै पार्टी अभियानलाई तीब्र रुपमा अघि बढाउने बताएका थिए।