बुधवार, श्रावण २७ २०७८

लुम्बिनीका मुख्यमन्त्री पाेखरेलको साथ छाड्दै भौतिक पूर्वाधार विकास मन्त्री सन्तोष पाण्डेयले दिए राजीनामा

नागरिक अनलाइन

2.3K

लुम्बिनीका मुख्यमन्त्री पाेखरेलको साथ छाड्दै भौतिक पूर्वाधार विकास मन्त्री सन्तोष पाण्डेयले दिए राजीनामा

बुटवल,साउन २७ ।

लुम्बिनी प्रदेश सरकारका भौतिक पूर्वाधार विकास मन्त्री सन्तोष पाण्डेयले पदबाट राजीनामा दिएका छन् । शंकर पोखरेल नेतृत्वको सरकारमा पार्टी नीति विपरित गएका मन्त्री पाण्डेयले मंगलबार राति राजीनामा दिएका हुन् ।

गत वैशाख ६ गते जसपाबाट मन्त्री बनेका पाण्डेयलगायत तीन जनालाई पार्टीले कारवाही गर्दै सांसद पदबाट हटाएको थियो । त्यसका विरुद्ध तिनै जना अदालत गएपनि सर्वोच्च अदालतले अन्तरिम आदेश दिन अस्वीकार गरेको थियो ।

उनले नागरिक अनलाइनस‌ँग भने -‘ अदालतबाट अन्तरिम आदेश आएन,मैले नैतिकताको आधार राजीनामा दिएँ ।’जसपाको तर्फबाट मन्त्री बनेका अन्य दुई जना विजय बहादुर यादव र कल्पना पाण्डेय भने मन्त्रीमा कायमै छन् । पाण्डेय रुपन्देही क्षेत्र नम्बर ३ (१) बाट प्रदेशसभा सदस्यमा निर्वाचित भएका थिए ।

लुम्बिनी प्रदेशमा जसपा ६ जना सांसदहरु रहेका थिए । पार्टीले कारवाही गरेपछि अव संसदमा जम्मा तीन जना सांसद रहेका छन् । ती सवै पोखरेल सरकार विरुद्धको गठबन्धनमा छन् ।

यता मुख्यमन्त्रीविरुद्ध दायर भएको अविश्वास प्रस्तावमाथि छलफलका लागि आजै प्रदेशसभाको विशेष अधिवेशन सुरु हुँदैछ । सरकार ढल्ने पक्का भएपछि आज बिहान एमाले संसदीय दलको बैठक बसेर मुख्यमन्त्रीले राजीनामा दिने संभावना छ ।