बुधवार, बैशाख २९ २०७८

आईसीयूमा अक्सिजन आपूर्ति राेकिँदा बुटवलमा ५ र भैरहवामा ४ जना संक्रमितको मृत्यु

२४ घण्टामा देशभर ९३०५ मा संक्रमण,१६८ जनाको मृत्यु,४४४४ निको

कपिल ज्ञवाली

10.7K

आईसीयूमा अक्सिजन आपूर्ति राेकिँदा बुटवलमा ५ र भैरहवामा ४ जना संक्रमितको मृत्यु

बुटवल,बैसाख २९-

अक्सिजन आपूर्ति राेकिँदा रुपन्देहीका अस्पतालहरुमा उपचाररत ९ जनाले बुधबार ज्यान गुमाउनुपरेको छ । बुटवलस्थित धागो कारखानामा सञ्चालित कोरोना विशेष अस्पतालमा अक्सिजन नपाउँदा ५ जना र भैरहवाको भीम अस्पतालमा उपचाररत ४ जनाको अकालमा मृत्यु भएको हाे ।

समयमा अक्सिजन आपूर्ति हुन नसक्दा आईसीयूमा उपचाररत ४ जना पुरुष र एक महिलाको मृत्यु भएको अस्पतालका प्रवक्ता डा. विष्णु गौतमले जानकारी दिए ।

बुधबार मृत्यु हुनेमा बुटवल–११ का २९ वर्षीय पुरुष,बुटवल १२ का ५० बर्षीय महिला,बर्दघाट-१४ का ४४ वर्षीया पुरुष,बुटवल ८ का ५२ वर्षीय पुरुष र बुटवल–१३ का ५२ वर्षीय पुरुष रहेको उनले बताए ।

‘अस्पतालमा माग अनुसार अक्सिजन छैन बाहिरबाट आउनुपर्ने अक्सिजन आउन आधा घण्टा ढिला भाे उपचाररत बिरामीलाई अक्सिजन सप्लाई रोकिएपछि संक्रमितको दुखद मृत्यु हुन पुग्यो।’

उनका अनुसार अक्सिजन आपूर्ति गर्ने उद्योगले आधा घण्टा ढिलो अक्सिजन ल्याइदिएका कारण बिरामीको मृत्यु भएको ती चिकित्सकले बताए ।

उक्त अस्पतालमा आईसीयूमा १६ जना उपचाररत थिए, तीमध्ये बुधबार पाँच जनाको मृत्यु भएको हो । उद्योगबाट आपूर्ति भएपछि अरु बिरामीले भने अक्सिजन पाएका छन् । यहि अस्पतालमा बिहान पनि उपचाररत ६ जनाको मृत्यु भएको थियाे ।

रुपन्देहीमा एकैदिन ९०७ जना संक्रमित,१६ जनाको मृत्यु :

रुपन्देहीमा पछिल्लो २४ घण्टामा ९०७ जना कोरोना संक्रमित भएका छन् । जिल्ला स्वास्थ्य कार्यालय रुपन्देहीले जारी गरेको तथ्यांकमा जिल्लामा आज सबैभन्दा बढी संक्रमित देखिएका हुन् । २४ घण्टामा १६ जनाको मृत्यु भएको स्वास्थ्य कार्यालयले सार्वजनिक गरेको छ । यस संगै जिल्लामा सक्रिय संक्रमितका संख्या ७ हजार २ जना पुगेको छ भने अहिले सम्म ३ सय ९ जनाको मृत्यु भएको छ ।

रुपन्देहीमा पछिल्लो २४ घण्टामा १ हजार २ सय ४ जनाको आरटिपिसिआर परिक्षणबाट ९ सय ७ जना संक्रमित देखिएका हुन । यो भनेको जाँच गरेका मध्ये ७५ प्रतिशतको नतिजा पोजिटिभ आएको हो । बुटवल उपमहानगर पालिकामा सबै भन्दा बढी १९० जना महिला र २०५ जना पुरुष गरि ३ सय ९५ जना संक्रमित भएका छन् ।

यस्तै तिलोत्तमा नगरपालिकामा ८९ महिला र ८५ पुरुष गरि १ सय ७४ जना, सिद्धार्थनगर नगर पालिकामा ४३ महिला र ५९ पुरुष गरि १ सय २ जना, ओमसतिया गाउँपालिकामा ५ जना महिला र ९ जना पुरुष गरि १४ जना, देवदह नगरपालिकामा २९ जना महिला र ५८ जना पुरुष गरि ८७ जना रहेका छन् । यस्तै सैनामैना नगरपालिकामा १८ जना महिला र ४१ जना पुरुष गरि ५९ जना, मायादेवी गाउँपालिकामा ५ महिला र ४ पुरुष गरि ९ जना संक्रमित भएका छन् ।

रुपन्देहीमा संक्रमणमा परि मृत्यु हुनेमा २ प्रतिशत मात्र रहेका छन् । अहिले जिल्लामा ३५ प्रतिशत सक्रिय संक्रमित र ६३ प्रतिशत निको भएको स्वास्थ्य कार्यालयले तथ्यांक सार्वजनिक गरेको छ ।

जिल्लामा अहिले सक्रिय संक्रमित मध्ये ३ सय ७६ जना लक्षण सहितका संक्रमित रहेको र उनिहरुको बिभिन्न पालिकामा रहेको आईसोलेसन सेन्टरमा उपचार भई रहेको छ । यस्तै अन्य ६ हजार ६ सय २६ जना होम आईसोलेसनमा बसी रहेका छन् ।

देशभर थप ९३०५ जनामा संक्रमण पुष्टि,१६८ जनाको मृत्यु :

देशभर २४ घण्टामा ९३०५ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार २०३६२ पीसीआर र ४२४ एन्टिजेन परीक्षणमा ९३०५ जनामा संक्रमण पुष्टि भएको हो ।योसँगै कुल सक्रतिमको संख्या ४ लाख २२ हजार ४१६ पुगेको छ ।

यस्तै, २४ घण्टामा ४ हजार ४४४ जना निको भएका छन् । योसँगै कोरोनामुक्त हुनेको संख्या ३ लाख १६ हजार ४६३ पुगेको छ ।आज कोरोनाबाट थप १६८ जनाको मृत्यु भएको छ भने हालसम्म मृत्यु हुनेको संख्या ४ हजार २५२ पुगेको छ ।