बुटवल,असाेज १- 

झन्डै ६ महिनादेखि  ठप्प रहेका लामो दूरीका सार्वजनिक यातायातआजदेखि सञ्चालनमा आउँदैछन्। 

मन्त्रिपरिषद्को सोमबारको बैठकले असोज १ गतेदेखि लामो दूरीका यातायात चलाउन दिने निर्णय गरेको थियो। ५० प्रतिशत बढी भाडा लिएर सिट क्षमताको आधा मात्रै यात्रु बोक्ने गरी सार्वजनिक यातायात चल्न दिने निर्णयमा उल्लेख छ। एक लाइनको सिटमा एक जना मात्रै यात्रु राखेर यातायात सेवा सञ्चालन गर्नुपर्ने सरकारको सर्त छ।

भौतिक पूर्वाधार तथा यातायात मन्त्रालयमा बुधबार मन्त्री, यातायात व्यवस्था विभाग र यातायात व्यवसायीबीच बिहीबारदेखि लामो दूरीका सवारी सञ्चालन गर्ने सहमति भएको छ। त्यसको मापदण्ड बनाउन यातायात व्यवस्था विभागलाई जिम्मा दिइएको छ। त्यही मापदण्डभित्र रहेर व्यवसायीले लामो दूरीका सार्वजनिक सवारी सञ्चालन गर्नुपर्नेछ।

दसैंका लागि अग्रिम टिकट सम्बन्धमा भने टुंगो लागेको छैन। १० दिनको अवस्था अध्ययन गरेर मात्र अग्रिम टिकट खोल्नेतर्फ केन्द्रित हुने महानिर्देशक गोगनबहादुर हमालले बताए। ‘करिब ६ महिनापछि लामो दूरीका सवारी साधन सञ्चालन हुँदै छ।

कोरोनाको प्रकोप सेलाएको छैन’, हमालले भने, ‘अहिले नै अग्रिम टिकटका सम्बन्धमा बोल्न सकिने अवस्था छैन।’ स्थिति सामान्य रहिरहे असोज दोस्रो सातासम्म सरोकारवाला निकायसँग छलफल गरी निर्णय लिइने उनले बताए।

अघिल्ला वर्षमा दसैं सुरु हुन लाग्दा उपत्यकाबाट थातथलो जाने यात्रुका लागि अग्रिम टिकट खुला हुने गरेको थियो। अग्रिम टिकट लिन यात्रुको लामो घुइँचो लाग्ने गर्छ।

यातायात व्यवसायीले विगत वर्षमा दसैंका लागि गाडी थप्ने गरेका थिए। तर, यो वर्ष कोरोना कहरको पीडामा रहेकाले गाडी थप हुने सम्भावना न्यून रहेको नेपाल यातायात राष्ट्रिय महासंघका महासचिव सरोज सिटौलाले बताए। ‘यातायात सेवा ठप्प रहेकाले व्यवसायी मर्कामा छन्। बल्ल यातायात क्षेत्र बामे सर्ने प्रयासमा छ। पुराना व्यवसायीलाई खर्च धान्न गाह्रो छ। गाडी थप गर्न आर्थिक रूपमा सम्भव छैन’, उनले भने।

अग्रिम टिकट अनलाइनमार्फत :

अग्रिम टिकट खरिद गर्न काउन्टरमा भीडभाड गर्दा कोरोनाको जोखिम उच्च हुने ट्राफिक इन्जिनियर आशिष गजुरेलको भनाइ छ। विगतको तुलनामा यस वर्ष उपत्यकाबाट दसैं मनाउन बाहिरिने यात्रुको संख्या कम हुनेछ। लकडाउन सुरु हुनुअघि धेरै जना उपत्यकाबाट बाहिरिएका थिए।

यस वर्षदेखि अग्रिम टिकट अनलाइनमार्फत बिक्री गरिने व्यवस्था कार्यान्वयनमा ल्याउनुपर्ने इन्जिनियर गजुरेलले बताए। ‘प्रविधिलाई आत्मसात् गर्ने यात्रुले अनलाइनबाट टिकट खरिद गर्नेछन्’, उनले भने, ‘अन्य यात्रुले टिकट काउन्टरमा गएर खरिद गर्नेछन्।’ यसरी अनलाइन र अफलाइन दुवै तरिकाबाट टिकट बिक्री गर्दा काउन्टरमा यात्रुको भीडभाड कम हुनेछ।

नागरिक अनलाइन

लेखकबाट थप

• बिहिवार, आश्विन १ २०७७०६:५१:५४

• Tags:

  # यातायात

• दुई हजार ६८८ मिटर लामो नागढुङ्गा-सिस्नेखोला सुरुङमार्गको उद्घाटन

• ‘द बम्बई लाउञ्ज’को प्रथम वार्षिकोत्सव साउन १४ र १५ गते हुदै,छुटसहित सांगीतिक कार्यक्रम गरिने

• इन्जिनियरहरू पूर्वाधार निर्माणका मात्र होइन, समाज रूपान्तरणका महत्वपूर्ण साझेदार

• आजदेखि कार्तिक शुक्ल एकादशीका दिनसम्म तुलसीको विशेष पूजा

• बुटवल अटोको स्थापना दिवस : ब्याडमिन्टन प्रतियोगितामा चौधरी–सारुको जोडी च्याम्पियन