बुधवार, बैशाख १५ २०७८

लुम्बिनी प्रादेशिक अस्पतालमा बेड नपाएपछि देवदहकी कोरोना संक्रमित महिलाको मृत्यु

नागरिक अनलाइन

3.1K

लुम्बिनी प्रादेशिक अस्पतालमा बेड नपाएपछि देवदहकी कोरोना संक्रमित महिलाको मृत्यु

बुटवल,बैसाख १५-

लुम्बिनी प्रादेशिक अस्पतालको फिभर क्लिनिकमै एक बिरामीको ज्यान गएको छ । कोरोना विशेष अस्पतालमा अक्सिजनयुक्त बेड नपाएपछि देवदह नगरपालिका–६ की ४९ वर्षीया महिलाको फिभर क्लिनिकमा उपचारका क्रममा मृत्यु भएको हो ।

उनी देवदह नगरपालिकाका एक वडा अध्यक्षकी श्रीमती हुन् । मंगलबार कोरोना संक्रमण पुष्टि भएकी उनमा उच्च ज्वरो, उच्च रक्तचाप र श्वास प्रश्वासमा समस्या थियो । उनलाई तत्कालै आईसीयूमा राखेर उपचार गर्नुपर्ने थियो ।

देवदहका मेयर हिरा खत्रीले बिहानैदेखि बुटवल धागो कारखानामा सञ्चालित कोरोना अस्पतालदेखि काठमाडौंको नर्भिक र ह्याम्स अस्पतालसम्म बेडको लागि कुरा गरेका थिए तर कतै नपाएको बताए ।

अस्पतालका सूचना अधिकारी डा. विष्णु गौतमले कोरोना विशेष अस्पतालमा बेड खाली नभएकाले फिभर क्लिनिकमै राखेर उपचार गरिएको बताए ।

प्रदेश स्वास्थ्य निर्देशनालयका अनुसार योसहित रुपन्देहीमा कोरोना संक्रमितको मृत्यु हुने संख्या १७५ पुगेको छ ।जिल्लामा २९५ जना संक्रमित विभिन्न अस्पतालमा उपचाररत छन् भने १३ सय १७ जना होम आइसोलेसनमा छन् ।

नागरिक अनलाइनमा प्रकाशित कुनैपनि सामग्रीबारे गुनासो,सूचना तथा सुझाव भए हामीलाई nagarikonlinenews@gmail.com मा पठाउनुहोला।)