बुटवल, २२ असार । 

रगतको अभाव भइरहेका बेला बुटवलका मुस्लिम समुदायले ९ औँ वृहत् रक्तदान कार्यक्रम सम्पन्न गरेका छन् ।

इस्लाम धर्मावलम्बीहरूको इस्लामिक नयाँ वर्ष १४४८ हिजरी तथा मोहर्रम महिनामा कर्बलाका सहिद इमाम हुसेन (रदियल्लाहू तआला अन्हु) को स्मृतिमा रजा–ए–मुस्तफा मस्जिद समितिले कार्यक्रम आयोजना गरेको हो ।

कार्यक्रमको शुभारम्भ गर्दै बुटवल उपमहानगरपालिका–१ का कार्यवाहक वडा अध्यक्ष अशोक राईले बुटवलको ऐतिहासिक महत्व बोकेको रजा–ए–मुस्तफा मस्जिदबाट धार्मिक गतिविधिसँगै शिक्षा र सामाजिक सेवामा पनि उल्लेखनीय योगदान पु¥याउँदै आएको बताए । उनले समितिबाट वडाभित्रका विद्यालय तथा मदरसामा भौतिक र शैक्षिक सहयोग गर्दै आएको कार्य प्रशंसनीय रहेको उल्लेख गरे ।
कार्यक्रममा समितिका अध्यक्ष अब्दुल सहमतले रक्तदानलाई जीवनदानको महान् कार्य भएको उल्लेख गर्दै मानव सेवाभन्दा ठूलो धर्म अरू कुनै नभएको बताए ।

उनले समाजमा रगत अभावका कारण कुनै पनि बिरामीले समस्या भोग्न नपरोस् भन्ने उद्देश्यले हरेक वर्ष रक्तदान कार्यक्रम आयोजना गर्दै आएको जानकारी दिए ।
कार्यक्रममा समितिका वरिष्ठ उपाध्यक्ष अकबर खानले मानवताको सेवामा समर्पित भएर संस्था अघि बढिरहेको बताए । बिरामीलाई फलफूल वितरण, अनाथ तथा अपाङ्ग व्यक्तिलाई सहयोग, शैक्षिक सामग्री वितरणलगायत सामाजिक उत्तरदायित्वका कार्यक्रम सञ्चालन गर्दै आएको उल्लेख गर्दै उनले संस्थाले कामकै आधारमा समाजमा पहिचान बनाएको बताए ।
इमाम मुक्ति साबले पवित्र कुरानमा उल्लेखित मानव सेवाको महत्वबारे प्रकाश पार्दै “जसले एउटा मानिसको जीवन बचाउँछ, उसले सम्पूर्ण मानव जातिको जीवन बचाएसरह हुन्छ” भन्ने सन्देश सुनाएका थिए ।
यसैबीच, बुटवल उपमहानगरपालिका–१ वडा कार्यालयको सहयोगमा समितिद्वारा सञ्चालित मदरसामा अध्ययनरत २५ जना विद्यार्थीलाई स्टेशनरी सामग्री, विद्यालय झोला, फोटोकपी पेपर तथा पोर्टेबल स्पिकर सिस्टम हस्तान्तरण गरिएको थियो ।
कार्यक्रममा समितिका पूर्वअध्यक्ष मक्बुल मियाँ, संस्थापक अध्यक्ष मोहम्मद इस्लाम, मदिना मस्जिद समितिका सबुर मियाँलगायतले समाज रुपान्तरणमा सामाजिक तथा धार्मिक संस्थाहरुको योगदानबारे चर्चा गरे ।

नेपाल रेडक्रस सोसाइटी, रक्तसञ्चार केन्द्र बुटवलको प्राविधिक सहयोगमा सम्पन्न कार्यक्रममा ६४ युनिट रगत संकलन भएको कार्यक्रम संयोजक तथा समितिका महासचिव हसरदिनले जानकारी दिए ।

नागरिक अनलाइन

लेखकबाट थप

• सोमवार, आषाढ २२ २०८३०९:१७:४१

• होटल पौवाद्वारा प्रधानमन्त्री दैवी प्रकोप उद्धार कोषमा ११ लाख रुपैयाँ सहयोग

• प्रभु बैंकद्वारा बुटवलमा रक्तदान, ५१ युनिट संकलन

• बुटवलको हिलपार्कमा ‘सप्तऋषि धाम’ उद्घाटन

• पश्चिमाञ्चल पेट्रोलियम डिलर्स एशोसियसनद्वारा प्रधानमन्त्री राहात कोषमा ४० लाख १ रुपैया आर्थिक सहयोग

• कांग्रेस क्षेत्र नम्बर–२ रुपन्देहीद्वारा विपद् व्यवस्थापन कोषमा ५१ हजार योगदान