आइतवार, मंसिर २८ २०८२

नेताहरूले अडान नछाड्दा महासचिवमा सहमति जुट्न सकेन

नागरिक अनलाइन

753

नेताहरूले अडान नछाड्दा महासचिवमा सहमति जुट्न सकेन

काठमाडौँ,मंसिर २८ ।

११औँ महाधिवेशन उद्घाटन सत्र सकिएलगत्तै शनिबार बेलुका एमाले अध्यक्ष केपी शर्मा ओलीले महासचिव शंकर पोखरेल, उपमहासचिव प्रदीप ज्ञवाली र पृथ्वीसुव्वा गुरुङलाई आफ्नो निवासमा बोलाए । ओलीले बोलाएका नेतत्रय ११ औँ महाधिवेशनमा महासचिवको उम्मेदवारका आकांक्षी हुन् ।

तीनै जनाले महासचिव दाबी गरेपछि अध्यक्ष ओलीले सहमति जुटाउन तीन नेतालाई बोलाएर छलफल गरेका हुन् । तर उक्त छलफलमा नेताहरूले अडान नछाड्दा सहमति जुट्न नसकेको स्रोतको दाबी छ ।

स्रोतका अनुसार गुण्डुमा करिब ४ घण्टा भएको छलफलमा महासचिव शंकर पोखरेलले आफू महासचिवको उम्मेदवार बन्नबाट पछि नहट्ने अडान राखेका थिए । जवाफमा पृथ्वी सुब्बा गुरुङले पोखरेल महासचिव भएर एक कार्यकाल बिताएकाले महासचिव पद आफूलाई छाड्नुपर्ने आशय व्यक्त गरेका थिए । उता प्रदीप ज्ञवाली दुवै जना अन्य पदमा प्रतिस्पर्धा गरेर आफूलाई महासचिव बनाउन प्रस्ताव गरेका थिए ।

‘अध्यक्षसामु तीनै जना नेताले महासचिवमा दाबी राख्नुभयो’, गुण्डु स्रोतले भन्यो, ‘छलफलका क्रममा पीएसले शंकरजी कुनै हालतमा हुदैन भन्नुभयो ।’

प्रदीप भए स्विकार्न सकिने पीएसको भनाई रहेपनि सहमति जुट्न नसकेको स्रोतको भनाइ छ । ओलीले महासचिव टुङ्ग्याएपछि मात्र अरू पद मिलाउन सकिने बताएका थिए । उनले उपाध्यक्षमा रामबहादुर थापा बादल, विष्णु पौडेल र गुरु बराललाई नै अघि सार्ने संकेत गरेका छन् ।

त्यस्तै उपमहासचिवमा पनि ओलीको चाहना पृथ्वी सुब्बा, प्रदीप ज्ञवाली र विष्णु रिमाललाई नै दोहोर्‍याउने ओलीको तयारी छ । सचिवमा भने ४ जना नयाँ अनुहार र तीनजना पुरानैलाई स्थान दिने ओलीको तयारी रहेको बुझिएको छ । उता ईश्वर पोखरेल समूहमा लागेका नेताहरू छुट्टै प्यानल बनाएर चुनाव लड्ने तयारी गरेपछि ओलीले आफ्नो समूहका नेताहरूको व्यवस्थापनका लागि यस्तो तयारी गरेका हुन् ।

यद्यपि ईश्वर समूहले पनि आफ्नो पक्षका ककसलाई पदाधिकारीमा अघि सार्ने भन्ने यकिन गर्न सकेको छैन । पोखरेल समूहले ओली समूहको प्यानल हेरेर मात्र आफ्नो प्यानल बनाउने रणनीति बनाएको छ । त्यसो गर्दा ओलीसँग असन्तुष्टलाई तान्न सकिने सो समूहको बुझाई छ ।

ओलीलाई आफ्नै समूहका नेताहरूको व्यवस्थापन गर्न र चित्त बुझाउन कठिन भएपछि आज बिहान साढे सात बजेबाट सुरु हुने भनिएको बन्दसत्र नै प्रभावित बनेको छ । बन्दसत्र अघि अध्यक्ष ओलीले भृकुटी मण्डपमा केन्द्रीय कमिटी बैठक बोलाएका छन् । ९ बजे बस्ने केन्द्रीय कमिटी बैठकमा ओलीले विधान संशोधनको प्रस्ताव लैजान सक्ने एक नेताले बताए ।

‘नेताहरूको व्यवस्थापन कठिन भएको छ । त्यसका लागि पनि अध्यक्षले विधान संशोधनको प्रस्ताव लैजान सक्ने देखिन्छ’, एक नेताले भने, ‘सहमतिमै नेतृत्व चयनको प्रस्ताव पनि अघि बढ्न पनि सक्छ ।’

नागरिक अनलाइनमा प्रकाशित कुनैपनि सामग्रीबारे गुनासो,सूचना तथा सुझाव भए हामीलाई nagarikonlinenews@gmail.com मा पठाउनुहोला।)