काठमाडौँ, असार २३ ।

नेपाली कांग्रेसका नेता नैनसिंह महरले जनताका समस्याप्रति संवेदनशील बन्न संसद् र सरकारलाई आग्रह गर्नुभएको छ । प्रकोप नियन्त्रणका लागि हाम्रो अभियानले आइताबार काठमाडौँमा आयोजना गरेको  ‘जलवायु परिवर्तन र प्रकोप न्यूनीकरणमा राजनीतिक दलको भूमिका’ विषयक अन्तरक्रियामा नेता महरले सो कुरा बताउनुभएको हो ।

समग्र सदन र सरकार जनताका एजेन्डामा केन्द्रित हुनुभन्दा दलगत फाइदा र बेफाइदामा अल्झिएको गुनासो उहाँले गर्नुभयो । अहिले देश भीषण वर्षासँगैको बाढीपहिरोले आक्रान्त बनेकाले सबै राजनीतिक दल जोखिम न्यूनीकरणमा केन्द्रित हुनुपर्ने महरको धारणा छ।  ‘विपद्जन्य घटनामा परेर दर्जन हाराहारी नागरिकले ज्यान गुमाइसक्नुभएको छ। 

‘सयौँ परिवार विस्थापित हुँदा करोडौँको क्षति भएको छ। यस्तो अवस्थामा सरकार र सदनले प्रभावकारी भूमिका निर्वाह गर्न नसक्नु निकम्मापन हो’ उहाँले भन्नुभयो । जनताका मुद्दामा केन्द्रित रहेर नीति निर्माण गर्नुपर्ने संसद् खाली सरकार बनाउने र भत्काउने काममा व्यस्त देखिएको उहाँको आरोप छ।  ‘जनताका आवश्यकताभन्दा सरकारमा बसेकाहरूले आफ्नो नैतिक दायित्व बिर्सिएर राहत र उद्धार कार्यमा तदारुकता देखाउन सकेका छैनन्’ उहाँले भन्नुभयो ।

समयमै जलवायु परिवर्तन र प्रकोप न्यूनीकरणका लागि उचित नीति निर्माण गरेर कार्यान्वयन गर्न सकेको भए आज यस किसिमको अस्तव्यस्तताको सामना गर्नु नपर्ने महरको भनाइ छ। जनताको पीडा संसद् र सरकारलाई दुख्नु पर्ने र सबै राजनीतिक दलले राहत तथा उद्धारमा केन्द्रित हुनुपर्ने उहाँको सुझाव छ । 

नागरिक अनलाइन

लेखकबाट थप

• आइतवार, आषाढ २३ २०८१०४:१६:१७

• Tags:

  # नैनसिंह महर

• प्रभु बैंकद्वारा बुटवलमा रक्तदान, ५१ युनिट संकलन

• बुटवलको हिलपार्कमा ‘सप्तऋषि धाम’ उद्घाटन

• पश्चिमाञ्चल पेट्रोलियम डिलर्स एशोसियसनद्वारा प्रधानमन्त्री राहात कोषमा ४० लाख १ रुपैया आर्थिक सहयोग

• कांग्रेस क्षेत्र नम्बर–२ रुपन्देहीद्वारा विपद् व्यवस्थापन कोषमा ५१ हजार योगदान

• पहिले र अहिलेका तीज ...