बुटवल,माघ १ ।

तीन जिल्लाको संगमस्थल ऐतिहासिक क्षेत्र गुल्मीको रूरूक्षेत्र स्थित रिडीमा माघे संक्रान्तिको अवसरमा श्रद्धालु भक्तजनको घुइँचो लागेको छ । गुल्मी, पाल्पा र स्याङ्गजाको संगमस्थल रूरूक्षेत्र गाउँपालिकाको रिडीमा माघे संक्रान्तिको अवसरमा रिडीस्थित कालीगण्डकी नदिमा स्नान तथा मेला अवलोकन गर्नेहरुको बिहानैदेखि घुँइचो लागेको हाे ।

माघे संक्रान्तिदेखि तीनदिनसम्म कालीगण्डकीमा स्नान गरेर हृषीकेश मन्दिरको दर्शन गरेमा मोक्ष प्राप्तहुने  विश्वास छ । हिन्दु धर्ममाविश्वास राख्नेहरुको बिहानैदेखि रिडीमा जमघट भएको हो ।

रिडीस्थित कालीगण्डकी नदीमा स्नान गर्ने र ऋषिश्वर देवताको दर्शन गर्न दर्शनार्थीहरू विभिन्न ठाउँबाट आउने क्रम शुरू भएको छ । 

अहिले तीन जिल्ला जोड्ने झोलुङ्गेपुल निर्माण भएपछि दर्शनार्थीलाई सहज बनेको छ । मेला तीन दिन चल्ने गर्छ ।  पाल्पा, गुल्मी र स्याङजाकै गण्डकी बगरमा छुट्टाछुट्टै कार्यक्रम आयोजना गरिएको छ । ठूलो ठाउँको कारण व्यापार गर्नेहरू गुल्मीतिर धेरै बस्छन् ।

गण्डकी स्नानपछि पाल्पामा ऋषिकेश मन्दिर भएकाले दर्शनार्थीहरू भीड हुन्छ । स्याङ्जामा पनि भलिबल, र्‍याफ्टिङ र सांस्कृतिक कार्यक्रम हुने गर्दछन् । कालीगण्डकी स्नानका लागि गुल्मी, पाल्पा, स्याङ्जा अर्घाखाँची, प्युठान, बुटवल, पर्वत, बागलुङ र भारतको सीमावर्ती क्षेत्रबाट समेत भक्तजनहरू आउने गरेको ऋषिकेश मन्दिरका पुजारी चुरामणि तिमल्सेनाले बताए । ​

रुरू मेला व्यापारका दृष्टिकोणले समेत प्रख्यात मानिन्छ । व्यापारका लागि स्थानीयदेखि रुकुम रोल्पा र भारतीय व्यापारीसमेत रुरू आउँछन् । रुकुमेली काम्लो, रोल्पाको घाँजी र बागलुङका बाँसका सामग्रीले रुरू बगर भरिभराउ हुन्छ । जाडो मौसममा ज्यादै न्यानो र गुणस्तरीय हुने भएकाले काम्लोको व्यापार राम्रो हुने रुरूमा पछिल्लो समय रेडिमेट कपडाले स्थान पाउन थालेको छ ।  रूरू सहित सत्यवती र छत्रकोटका किसानले कृषि उपज र रैथाने बालीको प्रदर्शनीको व्यवस्था मिलाएको रुरूक्षेत्र गाउँपालिका प्रमुख यदु ज्ञवालीले बताए ।

ज्ञवालीले तीन जिल्लाको संगमस्थल भएकाले जिल्लागत समन्वय अभाव भए पनि स्थानीय वडा र पालिकासँग समन्वय गरेर सुरक्षा व्यवस्थालगायतका प्रबन्ध राम्रो गरिएको बताए । रुरूक्षेत्र नेपाल पवित्र चार धाममध्ये एक हो । रिडीमा आजैबाट कालिगण्डकी गंगा आरती शुरु भएको खेमराज ज्ञवालीले नागरिक अनलाइनलाइ जानकारी दिए ।

नागरिक अनलाइन

लेखकबाट थप

• सोमवार, माघ १ २०८००९:२५:५२

• Tags:

  # रुरुक्षेत्र गाउँपालिका # रुरूक्षेत्र # माघे सङ्क्रान्ति

• प्रभु बैंकद्वारा बुटवलमा रक्तदान, ५१ युनिट संकलन

• बुटवलको हिलपार्कमा ‘सप्तऋषि धाम’ उद्घाटन

• पश्चिमाञ्चल पेट्रोलियम डिलर्स एशोसियसनद्वारा प्रधानमन्त्री राहात कोषमा ४० लाख १ रुपैया आर्थिक सहयोग

• कांग्रेस क्षेत्र नम्बर–२ रुपन्देहीद्वारा विपद् व्यवस्थापन कोषमा ५१ हजार योगदान

• पहिले र अहिलेका तीज ...