बिहिवार, मंसिर २१ २०८०

सभापति देउवालगायतका नेताले पदको मोह त्याग्नुपर्छ : महामन्त्री शर्मा

नागरिक अनलाइन

1.1K

सभापति देउवालगायतका नेताले पदको मोह त्याग्नुपर्छ : महामन्त्री शर्मा

घोराही, मङ्सिर २१ ।

नेपाली कांग्रेसका महामन्त्री विश्वप्रकाश शर्माले बदलिएको रुपान्तरित कांग्रेस बनाउन पार्टी सभापति शेरबहादुर देउवालगायतका नेताहरुले पदको मोह त्याग्नुपर्ने बताउनुभएको छ ।

कांग्रेस दाङले घोराहीमा आयोजना गरेको कार्यकर्ता भेटघाट तथा अन्तरक्रिया कार्यक्रममा महामन्त्री शर्माले पार्टीलाई आन्तरिक रुपमा बलियो बनाउन नेताहरुमा भएको पदको मोह हट्नुपर्ने बताउनुभएको हो । उहाँले भन्नुभयो, ‘पद भए ठिक, नभए बेठिक भन्ने संस्कारको अन्त्य हुनुपर्छ । पार्टीका लागि काम गर्ने नेता तथा कार्यकर्ताले पदको लोभ गर्नु हुँदैन ।’

पदलेभन्दा कामले नेतालाई लोकप्रिय बनाउने भन्दै महामन्त्री शर्माले पाँच पटक प्रधानमन्त्री बनिसक्नुभएका पार्टी सभापति शेरबहादुर देउवालगायतका समकालिन नेताहरुले अव पदको मोह त्याग गरी सम्मानित रुपमा बस्नुपर्ने बताउनुभयो ।

पार्टीका संस्थापक सभापति विश्वेश्वरप्रसाद कोइलाराले धनुषाको जनकपुरमा भाषणका क्रममा दाङका पर्शुनारायण चौधरीलाई भावी प्रधानमन्त्रीका रुपमा अघि सारेको, गणेशमान सिहं प्रधानमन्त्री बन्ने भनेको विषय उठाउँदै महामन्त्री शर्माले भन्नुभयो, ‘हाम्रो पार्टी सभापतिज्यू पाँच पटक प्रधानमन्त्री बनिसक्नुभयो । अव फेरि प्रधानमन्त्रीको लोभ गर्ने होइन ।’

अन्य नेताहरुले पनि पदकै लागि राजनीति गर्ने र पद नपाए सबै सक्किनेझैं गर्नु हुँदैन । बरु योग्य र सक्षमलाई नेतृत्वका लागि अघि बढाउनुपर्छ ।’ महामन्त्री शर्माले गौतम बुद्ध एक पटक पनि कुनै पदमा नपुगेर विश्वभरी चर्चित भएको भन्दै राम्रो काम गर्न पदको आवश्यकता नभएको बताउनुभयो ।

त्यसैगरी महामन्त्री शर्माले राष्ट्रपति एक कार्यकाल, प्रधानमन्त्री दुई कार्यकाल, मन्त्री तीन र संसद ४ पटकभन्दा बढी हुन नपाउने व्यवस्था गर्नुपर्ने धारणा राख्नुभयो । कांग्रेसकै कारण सशस्त्र द्वन्द्वका क्रममा रहेको माओवादी शान्ति प्रक्रियासँगै देशले संविधान, संघीयता लगायतका उपलव्धी प्राप्त गरेको भन्दै महामन्त्री शर्माले त्यही उपलव्धीका कारण देशले मधेशी समुदायसँगै महिला राष्ट्रपतिसँगै संसदमा समेत सवै जाति, समुदायको प्रतिनिधित्व भएको बताउनुभयो ।

नागरिक अनलाइनमा प्रकाशित कुनैपनि सामग्रीबारे गुनासो,सूचना तथा सुझाव भए हामीलाई nagarikonlinenews@gmail.com मा पठाउनुहोला।)